काठमाडौँ । नेपाल राष्ट्रिय क्रिकेट टोली ले यूएई राष्ट्रिय क्रिकेट टोली विरुद्धको दोस्रो टी–२० खेलमा उत्कृष्ट प्रदर्शन गर्दै ८ विकेटको सहज जित निकालेको छ । कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको खेलसँगै दुई खेलको सिरिज १–१ को बराबरीमा सकिएको छ ।
१२९ रनको सामान्य लक्ष्य पछ्याएको नेपालले मात्र १५.५ ओभरमा २ विकेट गुमाउँदै लक्ष्य पूरा गर्यो। नेपालको जितमा ओपनर कुशल भुर्तेलले शानदार अविजित ८४ रन बनाए । उनले ५७ बलमा १२ चौका र २ छक्का प्रहार गर्दै खेल जिताउने इनिङ खेले । कप्तान दीपेन्द्र सिंह ऐरी २३ रनमा अविजित रहे भने कुशल मल्लले १९ रनको योगदान दिए ।
यसअघि टस जितेर फिल्डिङ रोजेको नेपालले यूएईलाई २० ओभरमा ८ विकेट गुमाउँदै १२८ रनमा सीमित गर्यो । यूएईका लागि आकाशदीप नाथले अविजित ५३ रन बनाए भने मोहम्मद अरफानले ३२ र अदीब उस्मानीले ३० रन जोडे ।
बलिङतर्फ नेपालका सन्दीप लामिछानेले उत्कृष्ट प्रदर्शन गर्दै ४ ओभरमा १ मेडनसहित मात्र ६ रन खर्चेर ३ विकेट लिए । हेमन्त धामीले २ विकेट लिए भने नन्दन यादव र शाहब आलमले समान १–१ विकेट लिए ।
खेलको सुरुवातमै यूएईका कप्तान मोहम्मद वासिमलाई हेमन्त धामीले पहिलो बलमै आउट गर्दै नेपाललाई बलियो सुरुवात दिलाएका थिए । एक समय यूएई ८ ओभरमा ६ विकेट गुमाउँदै ४८ रनमा सीमित भएको थियो, तर नाथ र अरफानबीच ६४ रनको साझेदारीले टोलीलाई सम्मानजनक स्कोरमा पुर्यायो ।
यसअघि सोमबार भएको पहिलो खेलमा यूएईले ६ विकेटले जित हात पारेको थियो। दोस्रो खेल जित्दै नेपालले सिरिज बराबरीमा टुंग्याएको हो । अब नेपालले आगामी आईसीसी मेन्स क्रिकेट विश्वकप लिग–२ अन्तर्गत घरेलु मैदानमा त्रिकोणात्मक एकदिवसीय सिरिजहरू आयोजना गर्नेछ, जसमा नेपाल, ओमान, यूएई तथा पछि स्कटल्यान्ड र अमेरिकाबीच प्रतिस्पर्धा हुने कार्यक्रम रहेको छ ।
प्रक्षेपण राष्ट्रिय दैनिकबाट साभार ।
